Permiso para llorar

–Nun sías pijo, Lito, date permisu.

–¿Pa qué, ho?

–Pa llorar.

–Jobar.

–Nun sías bobu, ye lo meyor.

–¿El qué, ho?

–Dexase llevar por una hestoria emotiva.

–Bah, bah…

–¿Bah qué, ho? Tas tratando d’azorronar.

–¿Yo?

–Sí, Lito, sí, col nuedu nel gargüelu, carraspeando polo bajo...

–Na. Ye que ando gachu.

–¿Gachu? Tas más cayíu que la web de Renfe.

–Sí, bueno, yo…

–Nun sías bobu, Lito, nun yes l’últimu home na tierra.

–¿Qué, ho?

–¡Llora, home, llora! Yo voi querete igual. Non, voi querete más.

–Qué dirás…

–Les persones lloren non porque sían débiles sinón porque lleven muchu tiempu siendo fuertes. Y tú, Lito, tienes mucho acumulao.

–¿Yo?

–"El diario de Noa", "Los puentes de Madison", la carta de Pedro Sánchez…

–¿Apago la tele?

–Lleves muchu tiempu tragando lágrimes.

–¿Y qué?

–Nun tienes qu’aguantar y engarrate contigo mesmu. ¡Esto nun ye MasterChef, joder!

–Home, Trini, un paisanu de pelo en pechu…

–Tú yes más fuerte que’l camión de Prosegur, Lito, pero tas sensiblón. ¡Llora, coño!

–¿Quies callar?

–Llorar nun ye signu de debilidá, cielín. Al contrario.

–¿Qué, ho?

–Ye fortaleza emocional. Llorando, Lito, descargues, endelgaces, lliberes tou: lliberes tensión, tocín, oxitocina…

–¿Y eso qué ye?

–Una hormona fundamental pa ser feliz, pa relacionate colos demás.

–Bonu, apago la tele, va haber que cenar.

–¡Llora, cojona, non te dé vergüenza!

–Trini…

–Yes Piscis, Lito, un sentimental.

–Yá lo sé, ya.

–Tú, Lito, lloraríes viendo "Panorama regional".

–¿Queda algo d’empanada?

–Yes de pasta flora, fíu, más blandu que la barriga d’un camioneru. Y llorar coles películes ye bueno.

–¿Quies callar, Trini? ¿Quies callar?

–Dígolo pol to bien, pol to salú emocional. Precises soltar llastre, desfogate… Una catársis.

–¿Una qué, ho?

–Nun sías vergonzosu, Lito, date permisu.

www.maxirodriguez.net